Լսողության կորստի պատճառները

Լսողության խանգարումներ

Աշխարհում միլիոնավոր մարդիկ լսողության հետ կապված խնդիրներ ունեն. նրանց մոտ նկատվում է լսողության խանգարում կամ աղմուկ ականջներում: Սակայն նրանց միայն փոքր մասն է օգտագործում լսողական սարքեր: Լսողության խանգարումը միշտ չէ, որ կապված է մարդու տարիքի հետ, այն ազդում է բոլոր տարիքային խմբերի մարդկանց վրա: Բացի այդ, ավելանում է լսողության կորստով տառապող երիտասարդների թիվը։ Բայց լսողության կորստի ամենատարածված պատճառը դեռևս մարդու մարմնի ֆիզիկական ծերացումն է:

Եթե լսողության խանգարումը պայմանավորված է լսողական խողովակի կամ միջին ականջի վնասվածքով, ապա լսողության կորուստը կոչվում է կոնդուկտիվ կամ հաղորդիչ: Եթե լսողության կորստի պատճառը նյարդերի կամ զգայական բջիջների վնասումն է, այն կոչվում է սենսոնեվրալ:

Լսողության խանգարումը նշանակում է ոչ միայն ձայները նորմալ մակարդակով ընկալելու ունակության նվազում։ Որոշ մարդիկ մեծ դժվարությամբ են ընկալում որոշակի հաճախականությունների ձայները: Դա ազդում է «խոսքի հասկանալիության վրա, երբ մարդը լսում է, բայց չի հասկանում, թե ինչ են իրեն ասում։ Եթե երեխայի մոտ լսողության խանգարումը շատ ուշ հայտնաբերվի, դա կարող է շատ բացասական ազդեցություն ունենալ երեխայի լեզվի զարգացման և ընկալունակության վրա:

Լսողության խնդրի անտեսումը ինչպես երեխաների, այնպես էլ մեծահասակների մոտ կարող է հանգեցնել մի շարք բացասական հետևանքների։ Հաճախ լսողության խնդրի հետևանքով լսողության խանգարումներ ունեցող մարդիկ ունենում են մեկուսացման, հոգնածության և միայնակության զգացում: Քանի որ լսողության խանգարումը կապված է ծերության հետ և հաճախ ընկալվում է որպես հիմարության նշան, այն բացասաբար է անդրադառնում մարդու կյանքի վրա (օրինակ՝ դպրոցում կամ աշխատավայրում) և հետևաբար հանգեցնում է կյանքի որակի վատթարացման լսողության խանգարում ունեցող անձանց մոտ: Ուստի չափազանց կարևոր է հնարավորինս շուտ անհրաժեշտ միջոցներ ձեռնարկել՝ փոխհատուցելու լսողության կորուստը։

Լսողության կորստի փոխհատուցում

Լսողության խանգարումները երբեմն կարող են շտկվել վիրահատական կամ բժշկական ճանապարհով: Այնուամենայնիվ, շատ դեպքերում լսողական սարքերը միակ միջոցն են փոխհատուցելու լսողության կորուստը: Դա հատկապես վերաբերվում է լսողության սենսոնեվրալ խանգարումներին:

Այսօր կան մի շարք տարբեր տեսակի լսողական սարքեր, որոնց գործառույթները կարող են հարմարեցվել յուրաքանչյուր օգտագործողի կարիքներին և լսողության խանգարմանը: Կարևոր է հաշվի առնել, որ լսողական սարքերը չեն կարող վերականգնել նորմալ լսողությունը: Այնուամենայնիվ, դրանք կարող են կտրուկ բարելավել լսողությունը բոլոր իրավիճակներում՝ թույլ տալով կրողին ապրել ավելի լիարժեք կյանքով: